sexta-feira, 13 de setembro de 2013

My Hometown



















Qué ganas de partirle las costillas
al silencio.
                  Alberto Vega

MY HOMETOWN

Funerales, esconxuros, llábanes
alzaes a los díes que quedaron equí,
como los remordimientos y los amigos,
fogueres mataes del pueblu natal.
Vuelvo a casa porque enxamás
me despidí de vosotres, pantasmes
fosques de les cuentes pendientes,
nun vos di un abrazu nin vos coyi
la mano y agora si vos la doi
namás vais poder correspóndeme
col vuestru tembleque y el sangre frío.
Non, nun me despidí, porque nunca
quinxe marchar del too, dexé ende
un retayu furtiáu de la mio sombra,
una seña trazada en suelu con povisa
y cisca de carbón pa que m’atroque
un requexu a onde volver si canso
de tar llonxe y quiero dir a un sitiu conocíu.
Nadie nun lleva’l llar a cuestes
a nun ser los cascoxos y los que nada tienen:
los vagamundos y los desertores,
inda asina, yo, si fuere más sentimental
y nun andare mal del rema y la columna,
de la ciática y les ganes de remembrar,
bien que me prestaba carretar
a recostines dos ferraos polo menos
de la tierra onde nací, tres o cuatro
caxigalines que se perdieron en toles mudances
y que valíen como rosarios o fetiches
pa garrame a elles cuando les coses fueran mal.
Vuelvo al pueblu natal porque tengo tovía
ende un poco de familia –lo xusto pa querer
no íntimo y que nun moleste interesao
por cómo me va na vida-, tres amigos
del alma, ciertes calles y ciertes cases
vieyes de les de galería y cristalera
que me presta ver en pie y que de xuro
en diez años ya nun esisten. Y tantes
coses que namás equí puedo
deprender a olvidar pa siempre.


Sem comentários:

Enviar um comentário