sábado, 27 de julho de 2013

mater (dolor)osa

¿Qué espectatives tienen los que visiten Asturies per primer vez? Énte la fachada del Monesteriu de San Salvador de Curniana (de lo que va quedando d'él, cada vez más cerca de les ruines, como alerten los vecinos énte la desidia de les autoridaes competentes https://www.facebook.com/pages/Salvemos-la-Iglesia-y-el-Monasterio-de-Cornellana-de-la-ruina/597948423553969?fref=ts) atópome con unos amigos madrilanos que nun conocíen esta tierra. Los sos nenos, una pareya de ximielgos qu'aparenten el vivu retratu de Zipi y Zape, vienen decepcionaos de Somiedu porque nun vieron nengún osu al pesar de les esperances que-yos dieran los guíes turísticos locales.

Por amenorgar un daqué la decepción de los rapacinos, pregúnto-yos si quieren ver una osa y énte la incredulidá d'ellos y la sorpresa de los padres, enveredo a tola familia énte los mesmos murios del cenobiu pa ensiña-yos l'escudu principal. Embaxo'l cuadrante superior, qu'amuesa la figura del Salvador, una osa colos tetos abultaos de recién parida garra en cuello a una nena.

-¡Se la va a comer! -salta Zipi.
-¡La está estrangulando! -arrepostia Zape.

Los ximielgos ponen cara de nun creer una palabra de la que-yos cuento que la osa de piedra, llonxe de causa-y nengún dañu a la rapacina, tienla en cuello pa da-y de mamar. Ye l'emblema fundacional del monesteriu. La neña representa a la fundadora, la infanta Cristina, fía del rei Bermudo II de Lleón. La llienda cuenta que de bien pequeñina quedó perdida per aquelles biesques que xunen les tierres altes lleoneses colos montes y los vais del suroccidente asturianu y que la recoyó una osa pa curiala y criala como si fuera nacida de les sos mesmes coraes. Depués la osa llevóla hasta la vera d'un ríu onde baxaben por agua unos monxos ermitanos d'esos montes. Ya moza, la fía del rei mandó alzar una ilesia y un cenobiu nel sitiu onde la osa la dexó a salvu, consagrándolu por ello a Cristo San Salvador y llantando en piedra la estampa del animal nel dintel cimeru de la portalada.

Llevélos de siguío a la llamada, precisamente, Puerta de la Osa, nel ala oeste del monesteriu. Ende ta llabrada en piedra la representación más vieya del animal emblemáticu de San Salvador de Curniana, en cantu'l dintel d'un arcu que nos sos pies amuesa otres dos figures d'oses a entrambos llaos. Dellos estudiosos de la iconografía románica caltienen que la pieza central, la que caltién una figura humana ente les garres, ye de cierto un lleón, emblema del Reinu onde se fundó'l monesteriu y de xuro, tamién, representación del Lleón de Xudá. Puede ser. Sicasí les figures animales que tienen polos pies de l'arcada son inequívocamente dos oses.

Los mios amigos tenten congraciase colos fíos prometiéndo-yos qu'al día siguiente van dir ver a dos oses como aquelles, pero de carne y güesu, les famoses Paca y Tola. Ensin querer entemeteme n'asuntos familiares nun-yos oculto la mio disconformidá col destín d'atración pa turistes a les que condenaron de cuantayá a los probes animales del cercáu de Proaza unos tipos responsables d'una fundación supuestamente conservacionista. Fálo-yos de la vida en cautividá de Paca y Tola desque yeren dos esbardines güerfanes hasta los sos díes actuales, ya a les puertes de la vieyera y la decrepitú, nuna condena superior n'años a la de los presos etarres más veteranos. Del grotescu y disparatáu episodiu del semental Furaco, con tol so siguimientu mediáticu y el triste final: la cría malformada que parió Tola, ya muerta o sacrificada por instintu pola propia madre énte la so improbable supervivencia.

Esta hestoria murnia y truculenta despierta más l'interés de los ximielgos Zipi y Zape que la de la osa del Monesteriu de Curniana. Cuénto-yos arriendes que de la que yo tenía el so tiempu había n'Ovieu, no más céntrico de la capital, nel Parque San Francisco otra osa prixonera: Petra. La xaula onde la teníen metía les autoridaes del Conceyu o quien-y corrrespondiere aquella innoble responsabilidá nun debía tener más de tres metros de diámetru, descontando l'espaciu qu'ocupaba una especie de cueva artificial. Los rapacinos diben a retratase delantre d'ella y a meté-y ente les rexes barquillos con miel, la única dulzura que debió tener aquel probe animal en tolos sos años d'encierru. Llevaba ellí dende principios de los años cincuenta, de mano xunto a un esbardu hermanu, al que bautizaron como Perico y que malpenes sobrevivió en cautividá tres o cuatro años. De la que morrió dalgún macabru intelixente de la cosa público tuvo la ocurrencia de que lu disecaran y nesa espantible suerte de posteridá debe siguir el pelleyu de Perico escaecíu en dalgún cuartu de los trastos municipales de Vetusta.

A los nenos de los mios amigos madrilanos decepcionólos saber que los restos disecaos del hermanu de Petra nun s'esponíen al públicu en dayures. Por quita-yos de la cabeza el dir a ver a les prixoneres Paca y Tola, volvimos al sitiu de partida, énte l'escudu de San Salvador de Curniana y la osa que tenía en cuello a una rapacina. Pregunté-yos a Zipi y Zape por qué cuidaben ellos que l'animal taba a devorar a la neña o a estrangulala. Miráronme entrambos como si fuera bobu.

-Es lo que se supone que hacen los monstruos...-respondió Zipi o igual foi Zape.

Di-yos la razón, aceptando por válidu el so razonamientu. El casu ye que nun yeren los únicos que calteníen tala creyencia por verdadera. Saqué de la chistera una hestoria vieya que-y sintiera cuntar en cierta ocasión a un vaqueiru retiráu que ficiera, mientres la salú-y lo permitió, casi un cientu de primaveres el camín de les brañes de la mariña a los pastiales altos de Somiedu. De la qu'inda andaba a xubir el ganao dende la so braña de Valdés hasta Santa María del Puertu, una primavera nel alto, que tuvo a nevar hasta bien entráu mayu, tolos vaqueiros xuntaron a conceyu pa tratar d'un asuntu que los traía reconcomiaos: delles xatines aparecieran muertes pela nueche con traza de que les acometiera un osu...xunta los restos de los animales apaecíen buelgues fresques que dexaben impresa la firma del depredador. Los vaqueiros solventaron l'asuntu decidiendo toos a una entamar una batida a la busca l'animal que-yos taba provocando tantu trastornu. La única voz que se llevantó entós a la escontra del alcuerdu xeneral foi la d'aquel brañeiru que munchos años después diba cuntame esta hestoria. “Nun ía un osu -dixo'l discrepante-, que ía una osa, ya you a una osa nun la mato pur muita estroza que nus puoda faere...Diba sere comu matar a la mia propia mai, mirái lo que vus digo, bien lo sabe Dious...”. Los otros vaqueiros miraron con plasmu al so compañeru, unos pensaron qu'atocheciera, otros que bebiera más vino de Lleón de la cuenta -que ye cabezón y anecia a la xente, bebío n'escesu-. Entós él cuntó-yos aquella hestoria, de cómo-y salvara la vida una osa, siendo él rapaz y qu'enxamás-y cuntara a naide, por neta vergüenza.

La primer vez que lu mandaran solu los de so casa a baxar el ganao dende Santa María del Puertu a les brañes d'hibiernu de la mariña valdesana, foi una añu nel que la seronda aprució enantes de que'l calandariu la señalara y vieno a mediaos d'ochobre, después d'unes selmanes tan soleyeres y templaes como les del veranu, endemoniada de vendavales, xarazaes y hasta un envión de ñeve tempraniega. Los vaqueiros más veteranos namás notar el fustaxe d'aquella otoñada enveredaron el so ganao del puertu abaxo ensin esperar más amenacies del tiempu; él yera un novatín y quedó de los últimos que tovía nun atopaben el día de volver a les brañes d'hibiernu na mariña. Nuna nueche de nevadona, daquella nieve traicioniega d'entráu ochobre, salió de la so cabana cola guiada y un candilexu d'esquistu a buscar les sos vaques pa guiales a la corripia del Puertu y p'abellugar a les críes a techu d'una corte. La ñeve diba posando el so mantu blancu de fríu y muerte nos caminos y pastiales de la braña hasta les costeres onde pasaba la nueche el ganao. El rapaz andaba alloriáu, zapicando pel camín de ñeve y allumando la fosca biesca de solombres col candilexu. Debió trompicar en cantu d'un tochu que la ñeve nun tapara del too o nun furacu, cayó de focicos, perdiendo el candilexu y la guiada y esfrellando la frente contra una peña. Nun sabía precisar el tiempu que tuvo ellí, ensin sentíu, tiráu ente la ñeve, a mercé de los falompios que caíen del cielu y lu diben pasiquino sepultando nuna mortaxa de xelu. Despertáronlu unos rebusquinos na cara, la sensación prestosa d'un calor que lu aidaba a recobrar la consciencia y l'aliendu. Abrió los güeyos y pensó que siguía soñando, que sufría alucinaciones. Había una osa grandísima enriba d'él, con una cabeza tan grande como la d'un toru cubridor, sentía los rebusquinos del so focicu na cara y la so llingua, llarga y moyarienta, escalecía, llambiéndolu cola mesma mansedume delicada d'un perru. En cuantes l'animal percibió que'l rapaz daba señes de vida y movimientu separtóse d'él y pasu ente pasu foi allonxándose pel camín de la ñeve hasta desapaecer na escuridá. “Si gúei toi vivu foi gracias a aquel.la osa”, dixo el vaqueiru a los sos compañeros. “Pudo cumeme, dame una dentiel.lada na gorxa ya cumeme como si fuora un pitu ya siguir el sou camín tan tranquila...ya nun lo fixo...L.lambioume ya l.lambioume hasta que despertare comu si fuora un esbardín de sou...Ya esu a min nun se me vai esqueicer de pur vida...Nun conteis cunmigu pa dir matar una osa, que primeiro sacrifico a las mias nuviel.las una pur una, bien lu sabe Dious”.

Prestóme ver los efectos de la maxa de les histories vieyes escentellar nos güeyos atentos de Zipi y Zape y na sonrisa cómpliz de los mios amigos madrilanos. Agora foi ún de los ximielgos, nun sé si Zipi o Zape, el que me dio una lleción de sentíu común y sensibilidá que, ciertamente, nun esperaba.

- Yo paso de ir mañana a ver a esas osas enjauladas. No se lo merecen...



Sem comentários:

Enviar um comentário