terça-feira, 19 de fevereiro de 2013

casa de l'alcordanza
















Paseaba esti lluminosu meudía de febreru per tres la Ilesia de San Pedro cuando sentí, sobreponiéndose al ruxir del mareaxe, un cantarín infantil que muncho me sonaba:

Era uma casa
Muito engraçada
Não tinha teto
Não tinha nada
Ninguém podia
Entrar nela, não
Porque na casa
Não tinha chão...
Yera un son de Toquinho y entonábalu una moza que taba cola cabeza gacha, como rezando, asomada a la baranda de la Escalera 0 del Muro. Tenía les manes nos bolsos d'un chaquetonín d'hibiernu y chocaba la tristeza que-y escamplaba, viéndola d'espaldes, col humor revoltosu del cantar que taba a barruntar con un prestosu tastu brasileiru:

Ninguém podia
Dormir na rede
Porque na casa
Não tinha parede
Ninguém podia
Fazer pipi
Porque pinico
Não tinha ali...

En rematando la tonada, un quiebru d'emoción féxola repetir, la segunda voz con más rixu, los versos finales, nos que la señaldá y el querer mécense colo absurdo, col sinsentíu elocuente de la otra cara de la saudade: la ironía:


Mas era feita
Com muito esmero
Na rua dos bobos
Número zero.


Siempre tuvi la impresión de que determinaes muyeres, como los gatos, son a notar cuando dalguién les mira, inda tean de llombu. La moza yera d'esa clase de muyeres con un radar que detecta les miraes furtiaes y volvióse xusto cuando la terminaba de retratar. Ún tento disimular enfocando la cámara pa otru ángulu de la panorámica de San Llorenzo, pero debió facelo tan torpemente qu'ella al volvese dedicóme una sonrisa d'enigmática coquetería, sescudiendo'l pelo con una mano, como faen les modelos de la qu'esperen que'l fotógrafu siga disparando. Yera mulata, mui morena, con más tiez y rasgos de “preta” que de “branquinha”; los güeyos, sicasí, a la distancia que yo taba y nel intre breve nel qu'ella se viró, paecióme que los tenía claros, ente azules y verdes. Alloriáu y avergonzáu porque me descubriera cola cámara nes manes acabante retratala, siguí aparentar que disimulaba retratando el Club de Regates al otru llau d'onde ella taba y les cases de Cimavilla qu'asomaben tres les parés de la Ilesia San Pedro. Asina, retratando o faciendo que retrataba, fui esmuciéndome de la escena del crime, pasu ente pasu, hasta perdeme pela cuesta d'Honesto Batalón camín del Cerru Santa Catalina.

De la que xubía al Cerru, llibre ya del algame del mio escenariu de mirón retratista, viénome a l'alcordanza un cantar de Caetano Veloso nel que cuenta, a manera de llienda, el primer alcuentru ente dos amantes: él blancu y ella negra. Nun remembraba la lletra, inda sí lo que cantaba: falaba d'un tapecer nel que s'atoparon cerca'l mar el día y la nueche. Cruzábense a diariu a eses hores, el día, volviendo a casa, después d'una xornada dura de trabayu y la nueche, saliendo de casa pa entamar el so turnu llaboral. La confusión de la nubla del tapecer xuntólos y abrazáronse, besáronse, revolvieron los sos cuerpos pela playa, rebozándose d'arena y sudu excitáu. Después caún siguió el so camín: el día, de vuelta a casa, a descansar; la nueche, a cumplir cola so xera hasta qu'escamplare la primer lluz de l'alborada. Como despidida, el Día prometía-y a la Nueche alcordase siempre del secretu qu'entrambos compartíen cada vez que'l sol-y cariciase'l pechu y la Nueche, en troques, prometía-y guardar aquel secretu no más fondo del so corazón, cada vez que la lluna-y cariciare les tetes.

Tola mulatería del Brasil, venía a concluir Caetano Veloso, venía d'aquel alcuentru casual ente'l día y la nueche nel tapecer, esa hora ente lusco y fusco que por eso ye'l momentu más propiciu pal amor.


Aquella moza que canturriaba sola y gacha, concentrada na contemplación del foleaxe nes roqueres que llenden cola Escalera 0 del Muro de San Llorenzo, tres la Ilesia de San Pedro, pertenecía a aquella proxenie bayurosa en too Brasil de los fíos del día y de la nueche. Los sos güelos y bisgüelos, tolos sos antigüos, negros o blancos, portugueses o africanos, veníen del otru llau del Atlánticu, d'esa ribera batida por tolos temporales y les ventisquiaes de Norte a Sur y na que surdió esa enfermedá del alma, endémica en tolos pueblos que llenden col mar: la señaldá.

Descargo la semeya que saqué esti meudía nel ordenador. Vuelvo sentir el mesmu apuru y la mesma vergüenza que m'ablayaron de la qu'aquella moza se volvió acabante retratala. Póngome coloráu en remembrando la manera na que fuxí d'ellí, ensin dar desplicaciones. Agora prestábame topar otra vuelta con ella pa da-yles. Confesá-y que si la retraté ensin permisu nun foi porque tenga por costume fotrografiar moces perende, aprovechando que tán distraíes, que si la retraté foi por cuenta de la emoción que me tresmitió el so cantarín:

Era uma casa
Muito engraçada
Não tinha teto
Não tinha nada...

Porque tamién la casa de la señaldá d'ún yera igual, inda tuviere más cerca que la d'ella y ensin mar de metanes, como toles cases a les que soñamos volver alcuando porque ya nun atechen otru calor que'l de la nuestra alcordanza: curiosina, ensin techu, nin nada...fecha toa con munchu esmeru, na cai de los bobos, númberu cero.

Sem comentários:

Enviar um comentário