Depués
de tres nueches buscando cebera pel monte, la lloba volvió a
la cubil colos restos que quedaran d'un cabritu despeñáu
sabe Dios cuándo. Los tres llobatos salieron recibila mui
contentos, moviendo'l rau.
-
Mama, mama -aullaron, enllenándola de llambiotaes- ¿Qué
mos traes pa comer?
La
lloba dexó caer ente la ramasca los tucos de carne
apodrigañao.
-
¡Otra vez, carroña, mama! -dixeron a coru los llobatos,
decepcioaos.
- Ye
lo qu'hai, fíos...Y da-y gracies que lo tenéis, qu'hai
en tola collada y los contornos otros llobinos que de xuro güei
nun cuemen...
-
¡Tamos fartucos de carroña, mama! -retrucaron, otra vez
a coru, los cachorros.
Un
d'ellos, arregañó los caniles y foi más llonxe
na so protesta.
-
Pos, yo quiero más pasar fame que comer esa puxarra...-gruñó,
desafiando a la madre cola mirada.
- Pos
yo tamién -dixo otru.
- Y
yo -arrepostió'l terceru.
La
lloba baltió a los tres d'un emburrión cola pata.
-
¡Cómo nun comáis, va venir l'home y entós
si que vais ver la que ye bono!
Los
tres cachorros, arrevollicáronse muertos de risa ente la
xamasca.
-
¡L'home nun esiste! ¡Ye un cuentu! -dixo ún.
- ¡Si
esiste! -retrucó'l más espabiláu-. Lo que pasa
ye que nun nos puede facer nada porque somos especie protexía.
-
¡Eso! -dixo'l terceru.
La
madre lloba llevó les pezuñes a la tiesta, aparentando
un gran plasmu.
-
¡Ai, fíos del alma, inocentinos, qué poco
sabéis! ¡Cómo se conoz que sois nuevos! Claro
qu'esiste l'home y eso de que somos especie protexía sí
que ye un cuentu. Esiste l'home y ye'l nuestru peor enemigu. Nun lo
escaezáis enxamás. ¿Nun vos cunté yo la
hestoria del Llobu y Capiruchu Encarnáu?. Pasó de
verdá y nun hai tanto... ¿Alcordáisvos? Aquel
llobu afamiáu que s'atopó con una cría humana
que llevaba nuna cesta chorizos, quesu y una xarrina de miel y
pidió-y un poco y ella envez de da-ylo, solmenó-y un
cestazu con tol alma y el probe echó a correr y foi guardase
nuna casa humana, porque pensaba que taba abandonada y había
una vieya, que-y dio un sartenazu namás velu y escapó
dando voces: “¡El llobu, el llobu!” y vinieron unos
cazadores qu'andaben perende y al sentilos llegar al probe llobu nun
se-y ocurrió otro que marutase cola ropa de la vieya y metese
na cama aparentando que yera ella y los cazadores dicíen-y,
sonsañones: “¡qué manes más peludes
tienes, qué oreyes tan llargues, qué bocona tan grande
pa ser una vieya!” y ellí mesmo lu molieron a palos,
despelleyáronlu, cortáron-y la cabeza y fueron pal so
pueblu col pelleyu y la cabeza nun palu col mesmu sonsañu:“¡qué
manes más peludes tienes, qué oreyes tan llargues, qué
bocona tan grande!”. Y aquella cría humana que-y llamaben
Capiruchu Encarnáu y la vieya, que yera so güela,
aplaudíen a los cazadores y espatarrábense de risa
gritando: “¡El llobu, el llobu!”.
Los
tres llobatos mientres la madre-yos cuntaba otra vez la hestoria de
Capiruchu Encarnáu fueran plizcando a pocoñinos los
restos del cabritu hasta dexar namás los güesos, que
s'adormecieron rucando.
Sem comentários:
Enviar um comentário