El Padre A. ye lleonés, d'una aldea cerca de La Bañeza y afirma llevar cincuenta años enclaustráu en Samos. Por siguir poniendo a preba'l so sentíu del humor y por entamar conversación, a falta d'otru asuntu que me venga al calletre pa tratar con un monxu, dígo-y de la desamortización de Mendizábal. "Gran prócer, el señor Mendizábal, de vivir nos nuestros tiempos fuera ministru de Cultura d'esi paisanu míu que tanto bien fizo a España...¿cómo se llamaba? ¿Fontanero? ¿Marrullero?". Vese que'l benitu, llonxe de vivir ende na paz de los que fuxen del mundanal ruiu, non namás sabe quién ye Bisbal sinón que debe ser un fiel telespectador d'Intereconomía. Fáigo-ylo saber con esi llinguaxe que tan afayadizu-yos abulta a los freires, el de la falsa inxenuidá: "Asina que tienen ustedes equí vagar pa tar al tantu de lo que pasa perende aculló y de xuro que non namás polo que-yos cuenten los visitantes y pelegrinos ¿Ven la televisión?". El porteru de Samos mírame con cara de pocos amigos: "¿Veme usté cara de troglodita? Pos, claro que vemos la televisión. ¿Usté cree que'l Padre Feijoo, de vivir güei, nun diba ver la televisión y navegar per Internet?".
El monxu lleonés saca la navaya y escomienza a dar virulentes tayaes al so palu de fresnu mientres m'amuesa lo muncho que ta al día de los asuntos del sieglu con una encesa soflama política na que pon de vuelta-y media a los sindicatos a propósitu de la recién fuelga xeneral, a la izquierda laicista "que quier descristianizar España, ye dicir desculturizar el país, escomenzando peles aules", a los que "santificaron el pecáu nefandu nuna aberrante mazcarada de matrimoniu igual que faen los satanistes coles sos mises negres al coronar rei de los cielos y la tierra a un machu cabríu"... De les diatribes del benitu nun se salven nin la rapacería que fai botellón, nin la diversidá cultural y nacional del estáu, nin el feminismu, el post-feminismu, el vieyu y nuevu ecoloxismu, el 15-M, los perros-flauta y los moteros de fin del selmana. Tamién manifiesta una particular interpretación de los conceptos cristianos de la piedá y el perdón tocante a lo que él faría colos activistes armaos d'ETA: "Piedá con ellos, porque hasta esos asesinos tienen derechu a confesase y a que Dios los perdone, después lo mesmo qu'ellos faen: Pim-pam-pum, hasta que nun quede ún y sansacabó el problema del terrorismu".
Ún atendía horrorizáu a la encesa espirica del Padre A., mirando de regüeyu los viaxes de la navaya nel palu de fresnu y les forgaxes que saltaben, dexábalu falar porque nun sabía mui bien per ónde lo coyer y porque tien lleío abondo a Baroja y les sos hestories de cures trabucaires. De xemes en cuando el benitu soltaba una risotada tan estremista como les sos opiniones mundanes y ensin venir a cuentu intercalaba dalgún chiste o caxigalina del mesmu repertoriu qu'ún mesmu ya conocía de los tiempos nos qu'andó a estudiar colos Dominicos de La Felguera y que deben ser más vetustos que'l métodu Ogino.
Facía una tarde espléndida de primavera, la brisa esmarallaba sele les castañales y los abedurios a la oriella serena del ríu Oribio. Nun diba probece-y muncho a la nueche p'arropiellar el vai nel que Samos había ser talo lo describió Feijoo, en frase bien celebrada pol Doctor Marañón, esi llugar, encaxonáu ente montes, onde namás s'acolumbren les estrelles "si se llogren verticales". Too naquel entornu paecía convidar a l'armonía cola naturaleza y a la paz de los espíritus n'hermanu remansu, como dicía'l folletu turísticu, sicasí les palabres d'aquel monxu que llevaba mediu sieglu ensin salir de Samos, cada vez más enceses, más iraes, taben llegándome bien cerca d'esa lluriga onde adormez la bestia que toos llevamos dientro y esi freire paecía llevar tamién per fuera.
Mirélu seriu. Aquel puntu nun sabía que tenía delantre a un nietu de los que na comuna del 34 y nel 36 punxeron a los cures y a los freires a trabayar a picu y pala, a dalguién que, lo mesmo pensaba él del pim-pam-pum a los etarres, podía arrepostia-y qu'igual nun fuera tan nefastu'l prócer Mendizábal y que bien pacatu y curtiu fuera don Manuel Azaña n'asuntos relixosos, qu'entendía perfectamente la roxura de los quemaconventos y de los fusiladores del Sagráu Corazón... fala-y del verdaderu pecáu nefandu, el de los cientos de cures pederastes o de les monxes traficantes de neños, del fedor a peu del Diablu del so mugorientu sayón chiscáu de caspa y seguramente hasta de semen de cascala na soledá de la so celda pensando nes tetes de les Nereides de la fonte del claustru dieciochescu. Pensé too eso, enantes de dar por terminada la conversación -el so monólogu verborreicu-, dar media vuelta y dicí-y a manera de despidida maleducada: "Tien usté tola razón".
Sem comentários:
Enviar um comentário